ԲՀՀԻ հիմնադրամում 2021 թվականի օգոստոսից, Եվրասիա համագործակցություն հիմնադրամի կողմից Շվեդիայի կառավարության աջակցությամբ իրականացվող «Աջակցություն քաղաքացիական հասարակությանը՝ հանուն բարեփոխումների վրա ներգործության» ծրագրի շրջանակում, մեկնարկեց «Էլեկտրոնային գրագիտության և թվային անվտանգության դպրոց» ծրագիրը։ Ծրագրի հիմնական նպատակն է բարձրացնել երիտասարդների էլեկտրոնային գրագիտության և թվային անվտանգության իրազեկվածության մակարդակը և նպաստել կարողությունների զարգացմանը։ Ծրագրի երկրոդ փուլի նպատակն է խթանել ՔՀԿ-ների թվային անվտանգության կարողությունների զարգացմանը՝ անհատական դասընթացների, խորհրդատվությունների և աուդիտների միջոցով։
Ծրագիրն ունի մի քանի բաղադրիչ՝
Փուլ 1-ին
- Էլեկտրոնային գրագիտության և թվային անվտանգության դպրոցի (այսուհետ՝ Թվային դպրոց) հիմնում։
- Թվային անվտանգության վերաբերյալ հետազոտությունների իրականացում դպրոցի շրջանավարտների կողմից։
- Թվային դպրոցի շրջանավարտների կողմից փորձի-փոխանակման դասընթացների անցկացում։
- Թվային անվտանգության և էլեկտրոնային գրագիտության վերաբերյալ ուսուցողական ձեռնարկի ստեղծում։
- ՔՀԿ-ների թվային անվտանգության համախոհների ցանցի ստեղծում։
Փուլ 2-րդ
- Համախոհների ցանցում ներգրավված ՔՀԿ-ների իրազեկվածության բարձրացում և կարողությունների զարգացում՝ անհատական դասընթացների և խորհրդատվությունների միջոցով։
- Համախոհների ցանցում ներգրավված ՔՀԿ-ների շրջանում թվային անվտանգության աուդիտի անցկացում և վերլուծություն, առաջարկների մշակում
- Հայաստանյան ՔՀԿ-ների թվային և ֆիզիկական անվտանգության քաղաքականության ստեղծում և հասցեագրում։
Ծրագրի իրականացման առաջին փուլում Հիմնադրամը հաջողությամբ իրականացրել է իր առջև դրած խնդիրները, մասնավորապես․
- Շիրակի մարզում հիմնվել է Թվային դպրոց, որտեղ 3 ամիս տևողությամբ սովորել և ավարտել են 15 պատանիներ և երիտասարդներ։
- «Թվային անվտանգությունը երիտասարդների շրջանում» և «Էլեկտրոնային գրագիտության նշանակությունը կրթական հաստատություններում» թեմաներով իրականացվել են ուսումնասիրություններ Թվային դպրոցի շրջանավարտների կողմից։
- Շիրակի մարզում գործող ՔՀԿ և ուսումնական հաստատություններում, շահառուների և աշխատակիցների համար անցկացվել են Մեդիագրագիտության, թվային անվտանգության և էլեկտրոնային գրագիտության թեմայով փորձի փոխանակման դասընթացներ, որի արդյունքում ՔՀԿ-ներում և կրթօջախներում մասնակիցները խորացրել են իրենց բազային գիտելիքները, իսկ Թվային դպրոցի խորացված ուսուցմանը մասնակցած շրջանավարտները զարգացրել են իրենց դասավանդման և փորձի փոխանակման հմտություններն ու կարողությունները։
- Մշակվել է «Թվային անվտանգության և էլեկտրոնային գրագիտության» թեմայով ուսուցողական ձեռնարկ, որը նպաստում է առավել մեծ լսարանի իրազեկվածության բարձրացմանը։
- Ստեղծվել է համախոհների ցանց (այսուհետ՝ Ցանց), որին միացել են 20 և ավելի ոլորտով հետաքրքրված և գործունեություն իրականացնող կառույցներ և անհատներ։ Ցանցի համագործակցության ոլորտներն են՝
- Թվային անվտանգություն և թվային ռիսկերի կանխարգելում,
- Էլեկտրոնային գրագիտություն,
- Էլեկտրոնային հաղորդակցություն,
- Թվային անվտանգություն և էլեկտրոնային գրագիտություն աշխատաշուկայում և կրթական միջավայրում,
- Անձնական տվյալների պաշտպանություն,
- Անվտանգությունն առցանց սոցիալական միջավայրում,
- Ֆիզիկական անվտանգությունը թվային անվտանգության համատեքստում,
- Մեդիագրագիտություն և քննադատական մտածողություն։
Այս ողջ ընթացքում տեղեկատվական, ուսուցողական և իրազեկող նյութեր են հրապարակվել հիմնադրամի կայքում և սոցիալական մեդիայի էջերում, որի արդյունքում հարյուր հազարավոր օգտատերեր իրազեկվել են թվային անվտանգության և էլեկտրոնային գրագիտության համատեքստում։
Ծրագրի շրջանակում 2022 թվականի հունիսի 1-ից մեկնարկել է ՔՀԿ-ների կարողությունների զարգացման փուլը, որի շրջանակում պլանավորվում է Ցանցին միացած բոլոր կառույցների շրջանում իրականացնել թվային անվտանգության դասընթացներ։
Դասընթացի շրջանակում մասնակիցներին են ներկայացվելու կազմակերպությունների թվային անվտանգության երեք հիմնական ուղղությունների վերաբերող հիմնահարցերը՝
- Թվային անվտանգությունը կազմակերպության կառավարման համատեքստում։
- Թվային անվտանգությունը կազմակերպության հաղորդակցության և փաստաթղթաշրջանառության համատեքստում։
- Կազմակերպության շահառուների թվային անվտանգության վերաբերյալ իրազեկվածության մակարդակի բարձարցում։
Դասընթացները բաղկացած կլինեն տեսական և գործնական հատվածներից։
Միառժամանակ Ցանցին միացած հինգ կառույցների շրջանում հայտարարվելու է թվային անվտանգության անհատական աուդիտի և խորհրդատվության իրականացման կանչ։ Կազմակերպվելու են այցելություններ, որոնց ընթացքում ՔՀԿ-ների ֆիզիկական տարածքներում իրականացվելու է աուդիտի աշխատանքներ, որոնց արդյունքների վերլուծությամբ ներկայացվելու են առաջարկներ։
Թվային անվտանգության կարողությունների զարգացման, թվային անվտանգության անհատական աուդիտի և խորհրդատվությունների կազմակերպման նպատակով ԲՀՀԻ հիմնադրամը համագործակցում է Բազմակողմանի տեղեկատվության ինստիտուտի և «CyberHUB» կիբերանվտանգության աջակցության համար ստեղծված նախաձեռնության հետ, որի նպատական է կիբերանտվանգության հետ կապված միջադեպերի աջակցության թիմի և դրանց հետաքննության լաբորատորիայի միջոցով աջակցել ՔՀԿ-ներին, իրավապաշտպաններին, ակտիվիստներին, լրագրողներին և անկախ լրատվամիջոցներին։
Վերոնշյալ փուլում պլանավորվում է նաև մշակել թվային անվտանգության քաղաքականություն ՔՀԿ-ների համար։ Այն իր մեջ ներառելու է թվային անվտանգության ապահովման դրույթներ, պայմաններ և պահանջներ, մեթոդներ և գործիքներ, լիազորությունների սահամանափակման, տվյալների հավաքագրման, մշակման, պահպանման և ոչնչացման վերաբերյալ մոտեցումներ։ Թվային անվտանգության քաղաքականությունն ամբողջովին ծածկելու է կազմակերպությունների կառավարմանը, մարդկային ռեսուրսների կառավարմանը, հաղորդակցությանը, փաստաթղթաշրջանառությանը, տվյալների հետ աշխատանքին, էլեկտրոնային և թվային միջավայրում գործունեություն իրականացնելուն վերաբերող հիմնական հարցերը՝ ներկայացնելով դրանց կարևորությունը և այն պայմանների ստեղծումն ու ապահովումը, որոնք պարտադիր են։ Քաղաքականությունը նաև անդրադառնալու է շահառուների անձնական տվյալների պահպանմանը, շահառուների իրազեկվածության մակարդակի բարձրացման ուղղությամբ տարվելիք աշխատանքներին։
Թվային անվտանգության քաղաքականությունը տրամադրվելու է Ցանցին միացած բոլոր կառույցներին և հրապարակվելու է ԲՀՀԻ հիմնադրամի կողմից՝ ապահովելով դրա հասցեագրումը ՀՀ-ում գործող ՔՀԿ-ներին։
Last modified: